2022(e)ko martxoakren 31(a), osteguna

Zarauzko txorien kantak eta kontuak ezagutzeko irteerak

Apirilak 3 eta 10 ean, igande goizeko-09;00etan, Arkamurkako kide diren Eneko Azkue eta Pello Izkeagaren gidaritzapean Zarauzko Vista alegreko torreoian izango dira hitzorduak. Bertan txoriek beraien artean komunikatuz, gure belarriak horrenbeste goxatzen dituzten kantuak ezagutzeko aukera izango da. 

Ibilaldia, batere zailtasunik gabekoa izango da eta bidean gure inguruko txoriak eta hauen kantu ezberdinak ezagutzen lagunduko duten azalpenak emango dituzte Pello eta Eneko adituek. Adin eta ezaguera maila guztikoentzat dago zuzendua ibilaldi hau.

Jarduerak Vistalegreko parkean zehar izango dira eta guztira bi edo 3 ordu inguruko iraupena izango dute, prismatikoak  eta hegazti gidaren bat ekartzea ere gomendatzen da.

Garai batean, batez ere udaberrian, haur askoren afizioa zen, esaterako hegaztien habien bila ibiltzea edo hegaztien kantuak ikastea. Egun berriz, kontzientzia ekologiko haundiagoa duten arren, gazte askok ez dituzte euren inguruko hegaztiak edo beraien kantuak ezagutzen eta irteera honen helburuetako bat hori da, besteak beste gure inguruan degun basabizitza eder hontaz jabetzea eta bide batez gozatzea.

Irteera honetan ikusi eta entzungo diren hegaztietako batzuk dituzue hemen behean;

2022(e)ko martxoakren 16(a), asteazkena

DOKUMENTAL SOLASALDIA ; KLIMA ALDAKETAREN ARRISKUAK ZARAUTZEN



Martxoak 31, osteguna-19;00etan, Zarauzko Modelo aretoan izango den dokumental-solasaldi honetan parte hartzera gonbidatua zaudete. Bertan AZTI ren eskutik "klima aldaketa Euskal herrian; Itsas mailaren igoera" izenburua duen bideo dokumentaldi bat eskainiko da. Bideo honetan klima-aldagaiekiko erantzun fisiko eta biologikoen seinaleen joerak aztertu dituzte euskal itsasertzean eta estuarioetan.

Guk baino hobeto jakingo duzuenez, Zarautzek lehorretik zein itsasotik, berebiziko arrisku hidrologikoak ditu: batetik, herria paduraren gainean eraikita dagoelako eta bestetik, Jaurlaritzak berak seinalatu duelako Zarautz, itsas mailaren igoeren eszenatokietan kalte handienetarikoa jasoko lukeen herri gisa. Hala ere, Udalak ez ditu arrisku hauek jasota indarrean dagoen Hirigintza Plan Orokorrean. Bestalde, herritarrak bizkarra emanda bizi gara errealitate honi. 

Bideo dokumentaldiaren ondoren Klima aldaketan aditua den Elisa Sainz de Murietari emango diogu hitza. Berak urteak daramatza BC3 n  (Basque center for climate change) klima aldaketaren ondorioak aztertzen, besteak beste itsas mailaren igoerak ekonomian izango lukeen inpaktuaz. Ondoren, solasalditxoari emango diogu paso entzulegoa parte hartzera gonbidatuz.

Jakina da Klima-aldaketa eta hark eragiten duen itsas mailaren igoera mundu osoko arazoak direla, eta denoi eragiten digutela. Zarauzko Narros jauregiaren pareko hondartza zatia, marea goian denean urazpian geratzen da. Zientziaren helburuetako bat da etengabeko igoera horren arrazoiak eta ondorioak aztertzea. Mareografoen neurketek erakusten dutenez, 1950etik, Itsasoaren batez besteko Maila (IBbM) 1,8 mm igotzen ari da urtero.

2022(e)ko martxoakren 2(a), asteazkena

Lurgaiaren eskutik, auzo-lanean bertako basoak berreskuratzen

Duela hainbat urte, Gipuzkoako natur talde eta talde ekologistek, Arkamurka natura-elkarteak barne, hainbat gairen inguruan elkarrekin lana egiteko beharra ikusi genuen. Naturkon izena jarri genion guztiok biltzen gaituen elkarte horri eta, besteak beste, basogintza-ereduaren aldaketa sustatzen aritu gara hasieratik. Horretarako, Lurgaia Fundaziora hurbildu ginen, haiek aspalditik ari baitira lanean arlo honetan. Lurgaiaren eskutik, urtez-urte auzo-lanean bertako basoa berreskuratzeko lanak egiteko konpromisoa hartu genuen eta aurten ere, hainbat dira Gipuzkoan burututako ekimenak. 

Honi begira bi deialdi ditugu epe motzean gure inguruan: 
    1. Martxoaren 5ean, larunbatean Azkoitian (Madarixan). Argibideak lotura honetan
    2. Martxoaren 5ean Soraluzen ere egingo da.
    3. Martxoaren 12an, larunbatean, Aian, Urdaneta auzoko Izeta sagardotegiaren parkinean. Goizeko 09,00tan.
Azkoitiko eta Aiako auzo-lanera gure elkartetik hainbat pertsona hurbilduko dira. Parte hartzeko asmoa izanez gero, izena eman Lurgaiaren orrian eta elkarrekin joatea nahi izanez gero, guri jakinaraztea eskertuko genizueke.